Éxodo qellqamanta ñawinchay 3,1-8ª.13-15

¹ Moisesmi suegron Jetrópa chitankunata michirqa, Jetroqa karqa Madiámpa sacerdotenmi. Chay chitakunatam qatirqa chunniq purunman Horeb nisqan orqokama, Taytachapa orqonman.

² Chaypim Taytachapa Angelnin rikurirqa ratariq ninapa rikchaynimpi, chay zarza sachapa chawpimpi. Moisesmi rikurqa chay sacha rupaqta,  mana tukuspa kañakuqta. ³ Moisesmi: yuyaymanarqa: «Asuykusaq ma, qawamusaq wak hatun milagrota, imaynataq chayri chaynataqa ruparin», nispan. ⁴ Chayman Moises asuykuchkaptinmi, zarza ukumanta rimarimurqa Taytacha: «Moisés, Moisés», nispa.

Payñataqmi kutichirqa: «Kayqa kaypim kani».

 ⁵ Hinaptinmi payman nirqa Taytacha: «Ama astawan chayman asuykuychu; usutaykikunata hurqokuy, kay sarusqayki allpaqa, qollanan allpam». ⁶ Hinaspam nirqa: «Ñoqam kani ñawpaq taytaykichiskunapa Diosnin; «Abrahampa Diosnin, Isaacpa Diosnin, Jacobpa Diosnin».

Moisesmi chaypi uyanta pakarqa, Taytacha rikuyta manchakuspan.

⁷ Taytacham nirqa: «Rikurqanim llaqtay runakunata, Egiptopi, llumpay usuchisqa kasqankuta; qapariyninkutapas uyarirqanitaqmi, chay kamachiqninkuna sinchita paykunata ñakarichisqankuta. ⁸ Ñoqam uraykamusaq egitorunakunapa makinkumanta llaqtayta hurqomunaypaq. Paykunatam pusasaq huk hatun allpaman, lechepa, miskipa toqyamunanman.

¹³ Moisesmi Taytachaman tapurqa: chay Israel runakunaman rispaymi nisaq: “chay ñawpa taytaykichiskunapa Diosninmi qankunaman kachamuwan”, nispa. Sichus paykuna tapuwanqaku: «¿Imataq paypa sutinqa?», niptinkuri, ¿ima nispaytaq ñoqaqa paykunaman kutichisaq?».

¹⁴ Taytacham nirqa Moisésman: «Ñoqam kani Pim kaq». Kaynatam ninki Israel runakunaman: «Ñoqam kani» kaqmi qamkunaman kachamuwarqa, nispa.

¹⁵ Kaytapas paykunaman ninkitaqmi: «Dios, chay ñawpa taytaykichiskunapa Diosnin, Abrahampa Diosnin, Isaacpa Diosnin, Jacobpa Diosninmi ñoqataqa kachamuwarqa. Kaymi kanqa ñoqapa sutiy wiñaypaq, chay sutiwanmi qayakuwanqaku paykunapa churi-wawankuna, llapa paykunamanta hamuqkunapas», nispa.

Tayta Diospa Siminmi/ R/. Yupaychaykikum Apu Dios.

Salmo 102,1.4.6-8.11: Diosqa

¹ Diosta yupaychay, almallay, tukuy sonqowan sutinta yupaychay, ² Yupaychay Diosta, almallay, ama qonqaychu tukuy allin rurasusqaykita. R.

³ Paymi tukuy huchaykimanta pampachasunki, Paymi tukuy nanaynikikunamanta samachisunki, ⁴Paymi allpapi pampasqatapas hurqomusunki, Paymi kuyakuyninwan, wayllukuyninwan, huntachisunki, R.

⁶ Diosqa justicia ruwaqmi, sarusqa runakunata waqaychaq. ⁷ Reqsichirqam Moisesman ñanninkunata, Israelpa runankunaman mana niypas atina rurasqankunata. R.

⁸ Diosqa llampu sonqom, kuyapayakuqmi, mana chaylla piñakuqmi, kuyakuypa huntasqan. ¹¹ Maynatam hanaq pachakuna huqarikunku teqsimuyupa hawanta, an chaynatam kuyakuynin huqarikun Pay manchakuq runakunapaq. R.  

San Pablopa Corintiosman ñawpaq qellqamanta ñawinchay 10, 1-6.10-12

Wawqe paniykuna: ¹Manam qonqanaykichista munanichu chay  ñawpa taytanchiskuna puyu ukumpi pusasqa kasqankuta, mama-qochanta chimpasqankuta, ² chaymanta, Moisespa kamachisqan, imaynam llapanku bautizasqa kasqankutapas. ³ Hinallataq, imaynam chay Janaq-pacha mikuyta llapanku mikusqankuta. ⁴ Llapankutaq hina chayna Janaq-pacha upyayta upyasqankutapas; upyarqakuqa qollanan qaqamantam, chay qaqaqa kikin Cristom.

⁵ Ichaqa, paykunamanta, achka runam Diospa sonqonman hinachu kawsarqaku, chaymi chay chunniq purumpi tarirqaku wañuyta.  

⁶ Tukuy chaykunam karqa ñoqanchis chayta yachaspa, chayta qawaspa mana allinkunamanta, paykunapa ruwasqanman hina, karunchakunachispaq

 ¹⁰ Amayá Taytachamanta rimaychischu Paypa qepampi, imaynam paykunamanta wakinkuna rimarqaku hina. Chay runakunam wañurqaku chay puchukachiq Angelpa makimpi.

¹¹ Tukuy chaykunam karqa qamkunapaq huk ejemplo hina, qellqasqapas karqaku ñoqanchis yachananchispaq; chay punchawkuna huntasqa kaptin kawsaqkuna yachananchispaq.

 ¹² Chaynaqa, pipas sayampa kasqampaq hapikuq, allinta qawakuchun, yanqataq urmarunman.

Tayta Diospa Siminmi/ R/. Yupaychaykikum Apu Dios.

V. / Apunchis Dios qankunawan kachun. R/ Hinallataq qanwampas

Evangelio San Lucaspa qellqasqamanta ñawinchay 13,1-9

R/ Qampaq gloria kachun, Apu Dios.

Huk kutim ¹ huk’kuna Jesusman willarqaku imas karqa chay Galileokunawan, imaynam Pilatos paykunapa yawarninta piturqa diosninkuman sacrificio rurasqanku yawarkunawan.

² Paymi nirqa: ¿qamkuna ninkichischu chay Galileokuna, wakin galileokunamanta, aswan huchasapa kasqankuta, chayna wañunankupaq? ³ ¡Manam!, aswan cheqapllatam nikichis: qamkunapas Taytachaman mana kutirimuspaqa, chaynallataqmi kankichis.

⁴ Chaynallataqmi chay chunka pusaqniyuq Siloé torrepa ñitisqan wañuqkunamantapas: ¿qamkuna ninkichischu chaykuna llapa chay Jerusalempi tiyaqkunamanta aswan huchasapa kasqankuta? ⁵ ¡Manam! Cheqapllatam nikichis: qamkunapas Taytachaman mana kutirimuspaqa, chaynallataqmi wañunkichis, nispa.

⁶ Chaymi kaytapas willarqa: Huk runam higos sachata tarpurqa uvas chacrampi, hinaspam wayun pallaq hamurqa, ichaqa manam huktapas tarirqachu.

⁷Chay raykum kamayunman nirqa: qaway kayta: ñam kimsa wataña ñoqa hamuni kay higospa rurun pallaq, ichaqa sapa kutim yanqalla, yanqalla. Chay sachata takaruspa wischumuy, ¿imapaqtaq yanqa kanqa chacraypi?

⁸ Ichaqa kamayummi payman kutichirqa: tayta, kay watatawanraq hinata saqeykuy: mapas muyuriqninta aspispay, wanutaraq hinarqosaq, ⁹ ichapas wayurqonmanraq. Mana chayna kaptinqa, takarunkipunichá, nispa.

V/. Tayta Diospa Siminmi/ R/. Qampaq gloria kachun, Apu Yaya Jesucristo.

Descargar Documento en PDF